လက်တင်အမေရိကနိုင်ငံတွေကိုသွားရောက်နေတဲ့ အမေရိကန်နိုင်ငံခြားရေးဝန်ကြီး Marco Rubio ဟာ ဒီနေ့မှာတော့ ဒိုမီနီကန်နိုင်ငံခေါင်းဆောင်တွေနဲ့ တွေ့ဆုံဆွေးနွေးဖို့ ဒိုမီနီကန်ရီပတ်ဘလစ်နိုင်ငံကို ရောက်နေပါတယ်။ ဒါဟာ ဝန်ကြီး Rubio အတွက် သူရဲ့လက်တင်အမေရိကနိုင်ငံ ခရီးစဉ်အတွင်း နောက်ဆုံးသွားရောက်တဲ့နိုင်ငံဖြစ်ပါတယ်။
ဝန်ကြီး Rubio ဟာ ဒိုမီနီကန်သမ္မတ Luis Abinadar ၊ နိုင်ငံခြားရေးဝန်ကြီး Roberton Alvarez တို့ နဲ့ ဆန်တိုဒိုမင်ဂိုမြို့တော်မှာ တွေ့ဆုံမှာဖြစ်ပါတယ်။
ဝန်ကြီးရူဘီယိုဟာ မနေ့ကတော့ ဂွါတီမာလာနိုင်ငံကိုသွားရောက်ခဲ့ပြီး အမေရိကန်ပြည်ထောင်စုအနေနဲ့ ဂွါတီမာလာနိုင်ငံရဲ့ အခြေခံအဆောက်အအုံစီမံကိန်းအသစ်တွေကိုအကူအညီပေးဖို့အစီအစဉ်တွေနဲ့ အမေရိကန်နဲ့ ဂွါတီမာလာကြား အကျိုးတူဆောင်ရွက်မှုတွေ အားကောင်းလာအောင် အမေရိကန်က ပြည်ပနိုင်ငံတွေကို ပေးနေတဲ့ အကူအညီတွေကိုမရပ်ဆိုင်းဘဲ ကင်းလွတ်ခွင့်ပေးဖို့ အစီအစဉ်တွေကို ကြေညာခဲ့ပါတယ်။
တချိန်တည်းမှာပဲ အမေရိကန်နဲ့ ဂွါတီမာလာကြား ရွှေ့ပြောင်းအခြေချနေထိုင်ရေး အစီအစဉ်သစ် တရပ်ကို သဘောတူခဲ့ကြပြီး အဲဒီအစီအစဉ်အရ ဂွါတီမာလာအနေနဲ့ အမေရိကန်ကနေ လေယာဉ်နဲ့ ပြည်နှင်ဒဏ်ပေးလိုက်တဲ့ ဂွါတီမာလာနဲ့တခြားနိုင်ငံသား ၄၀ %. ပိုပြီး လက်ခံဖို့ဖြစ်ပါတယ်။ အမေရိကန်ပြည်ထောင်စုဟာ ပြီးခဲ့တဲ့ ၂၀၂၄ ခုနှစ်အတွင်း ဂွါတီမာလာနိုင်ငံသား ၇ သောင်းလောက်ကို သူတို့ရဲ့ နေရပ်ရင်းကို ပြန်ပို့ခဲ့ပါတယ်။
ဝန်ကြီး Rubio ဟာ နိုင်ငံခြားရေးဝန်ကြီးအဖြစ်နဲ့ သူရဲ့ပထမဆုံးခရီးစဉ်အဖြစ် လက်တင်အမေရိကမှာ ရှိတဲ့ El Salvador, Guatemala, Costa Rica, Panama, နဲ့ Dominican Republic နိုင်ငံ ၅ နိုင်ငံ သွားရောက်ခဲ့တာဖြစ်ပါတယ်။
Your browser doesn’t support HTML5
ဝန်ကြီး Rubio ရဲ့လက်တင်အမေရိကငါးနိုင်ငံ နောက်ဆုံးခရီးစဉ် ဒိုမီနီကန်နိုင်ငံရောက်မည်